Dinsdag 11 Julie 2006

Ek het gisteraand begin met demo - troukaartjies en 'n paar op die rekenaar gedoen. Daar is definitief nog baie werk voor die finale produk, maar vir 'n 1ste poging dink ek nie dis te sleg nie! Die bewoording is steeds bietjie tricky en ek soek nog na die regte woorde.

Nog 4,5 maande oor - die fotograaf het al vanoggend gemail om te hoor of ons reëlings nog op track is. Dirk du Plessis en sy vrou Mariëtte neem saam die foto's. Ek het hulle ontmoet by my nefie se troue 'n jaar gelede en toe ons iemand begin soek was hulle een van die enigste mense wat nie vra dat jy 'n tweede verband op jou huis moet uitneem om die kostes te dek nie. Hulle het uitgekom en ons op 'n geleë tyd kom sien om hulle portefeulje te kom wys. Die foto's is baie professioneel gedoen. Jy kry al jou foto's in 'n album sowel as jou negatiewes en dan word daar so ongeveer 'n ekstra 300 foto's op 'n cd gesit wat dan nie geprint is nie. Enige kombinasie van hoeveelheid foto's (swart & wit, sepia en/of kleur) is moontlik. Hulle is regtig baie flexable wat dit aanbetref.